PostPoems Be Artistic. Be Creative. Be Inspired!

ما بين الصورة وبين الاصل

ودمى الراكد فى الشريان

لسه بعيش فى إطار مشروخ

وبدوخ

أكمنى بصدق لون الحيط فى الضل

بتغرب جوه عيون الرؤيا سنين

واعود .. مرصود

على رهبة جدى الساجد للفرعون

أشتاق ..

لعصايةموسى تشق البحر

ولارض بتمضغ كنز قارون

مجنون  ..

طول عمرى بخاف

من كهنة بتسرق حلمى بأسم الشمس

وآمون الزارع

ياسى ف قلب سنين العمر

مليت ..

طليت بعيونى من البراويز

ما لقيت

غير موميا بتصرخ

جوه تابوت

فين رع

فين رع .. حتموت

وهياكل طاله من الفتارين

بتقول للصرخه تبطل دبح

وبتنشد سطر البعث الغافى

جوه فى حلق كتاب الموتى

أنوبيس أتعاطف لحظه وقال :

للمره الاولى أتمنى أنها متجيش

لكن عزازيل

بيخربش روحها مصر تغيب

طعم حلاوة الروح اتمرر

صمت

والصمت أسترسل فى التعاويذ

مع إنه فوقيه

كت ضحكة ست

بتملى فراغ السقف الهاير

م الخيانات

و أيزيس

بتشد الشيش عن منظر جوف النيل

يمكن تلمح ايد أزوريس

أو حورس .. وهم

حورس وهم

بيصحى الصيف فى برودة الجو

جرانيت الصبر بيتاوب

على قولة حورس وهم

مساخيط الماضى بتتضخم

وبتكتب على بلاطات الخوف

بحروف

بتجسد كلمة مارد

وسبايك العند بتجذب

كل التبر الهايم فى السراديب

شديت حجرين العين للداخل

لما آدان الضهر

أتسلل م الشبابيك

بيحاول ينغز

كل خلايق بيت الموت

أنا نمت

فى منامى

لقيت الرؤيا بترسم نار

بتضم فى متحف شمع

كبيييييييييييييييييييييييير

********