Author Information
Soos 'n boom by waterstrome (Psalm 1:3)
Saam met jou, vlinderhandvrou,
het ons 'n boom geplant:
'n mostertsaadjie skugter liefde
in swartbruin kreukelhande toegevou.
Die boomkind het egter sku ontwaak
en vaak dog gretig gedrink
uit die kristalhelder strome diep
in die vallei van moontlikhede.
Daarom, vrou van my hart,
kan ons nou in ons boom se skadu sit
waar ek jou teen my wil vashou
en op 'n tapyt van bloeisel beloftes
saggies in jou oor fluister:
"Ek is werklik lief vir jou."
