Author Information
water
jou sout-soet groet
en koel omhelsing
bring meteens verligting
ná die waan en wilde storms
jou uitgestrekte wit arms
is tot oorlopens toe vol
met die belofte van rus
waarna ek al 'n ewigheid smag
jou groen-blou oë
verpletter my skanse
en sien die seer
waar geen ander kon kyk nie
jou kalm sprokieswêreld
is die poort
na die hier onbereikbare
terugkeer na kindwees
jy sus my aan die slaap
voor ek in 'n paniekbevange oomblik
kan dink aan die spoke
van gister
