Author Information
die dood van 'n uil
deur die stilte bars die doodse slag
van vleis en been
teen ongenaakbare staal
bande skree
honde blaf
'n stem of twee
“Hulle't 'n diertjie raakgery.”
hy lê langs die pad
vlerke oopgesprei
kloue gereed vir die aanval
majestueuse skoonheid
'n veerligte lykie in my arms
wysste van die diereryk,
hoe't jy dan vanaand
vir jouself boodskapper gespeel?
my hart het vannag 'n nes
vir hierdie uilkind geword:
hoe verwerk ek dood?
hoe vergeef ons mekaar?
hoe maak alles sin?
hoe gaan ek aan?
hóé
hóé-hóé
hóé
