Author Information
إحتلال
Folder:
عاميَّة برضه إحتلال
رغم الأغاني والوشوش السمر
والدم الفطيس
الليل غطيس
الفجر غرقان في الهويس
وفؤادة ماتت من زمان
والظلم عشش في الغيطان
عتاريس
عتاريس
مايخونش قلب العاشق اللي خطوته
ف حبك مرار غير الخسيس
ماينامش في حجرك شقايا في النهار
وفي المسا بتباع رخيص
يا ناعسة مين باع الضفاير ولا مين لهف التمن
ليه تغزلي حلمك جنين
زيّن جبين لا يؤتمن
قضبان عيونك اللي ساجنا عمرنا
مابقتش عارفة هو مين فينا الولي ومين الجبان
وفؤادة ماتت من زمان
والظلم عشش في الغيطان
عتاريس عتاريس
برضه إحتلال
واسيادنا دوم
ماسكين لجام وحزام وسوط
والخوف تلال
لو مرة مال
حيلهم ف ضهر الغلبانين
حيروح لفين؟
اللي ما جرب يعيش
غير تحت رجل الغاصبين
حيروح لفين؟
اللي مش عايز يموت
غير في قطيع المحكومين
حيروح لفين؟
وسط الغيوم
وسماه بترعد كل يوم
تشتي في حجره ييجي ميت سؤال
مش مفهومين
حيروح لفين بالميت سؤال؟
غير للزعيم أبو صوت فخيم
حضرة وكيل الاحتلال
