Author Information
مانيش خايف
Folder:
عاميَّة
برغم الخوف اللي عم ينعق
كما البومة
على شواهد الشهدا
وع الشاشات
وفي الجرانين
برغم ميدانك الفاضي
وبكرة اللي غلبت أداديه
واحايل فيه
وانادي عليه
عشان ييجي ومش راضي
وأستك ذمة القاضي
وعتمة ليلي في الزنانين
وعارف سكتي فيكي
وحافظ كل حواريكي
وليه ميت حساب مفتوح
على النوتة في قهاويكي
ولما ارجع في وش الفجر
عشان ارتاح
متوارب بسيب الشيش
وسايب ضحكتي بقشيش
في وش الباشا والدرويش
في وش ماسورة المدفع بتاعة الغاز
في وش المية والخراطيش
وحتى في الرصاص الحي
ربط قلبي ضميري الحي
وصاحبي اللي سند ضهري
ولا عرفته ولا عرفنيش
ولساها كده الصورة
بهيّة زي فلق البدر
منديّة كعود أخضر
فماتحاولوش تداروها وتكسوها بلون الغدر
حيفضل حلمها موجود
ويفضل قلبنا شايف
