Author Information
والله زمان يا مصرنا
Folder:
أحاسيس رومانسية والله زمان يا مصرنا
ياللى فرحك فرحنا
وجرحك جرحنا
فاكره زمان جيرانا
مجدى ومحمود وأحمد ومينا
كانوا يشاركونا فرحنا
وأول ناس يواسونا فى حزننا
وكمان فاكره أهلنا
كانوا كل يوم عندنا
فى العيد نتلم فى أرضنا
وفى شم النسيم نسعى لفرحنا
يتلموا الولاد والبنات
ونحس باللمة وأنس أهلنا
والله زمان يا مصرنا
كنا فى السكاكينى برضه يا عمنا
وفاكره المدرسة جنب بيتنا
وعم فرحات بتاع الحراكنش
وعم نور بقال حتتنا
وام خالد تدينا الخردوات
وعم نصيف المكوجى
ومجدى واحمد جيرانا
يتلموا ويلعبوا الكوره قدامنا
وفى رمضان يزينوا شارعنا
بالزينات والفوانيس المنوره
والله زمان يا مصرنا
ابن الجيران فى بلدنا
جدع اسمرانى وحليوه
يطل من الشباك علينا
وبنوته جميلة فى حتتنا
خدودها لون التفاح فى ضحكتها
تنور الشمس شعرها فى لمعتها
كانوا بيلعبوا معانا فى شارعنا
والحب البرئ اتولد بينهم
وفضل عايش مع طفولتهم
مكنش حد يقدر يقرب ناحيتهم
كانت بتراقبوا من ورا شباك بيتهم
وهو يقف على ناصية شارعهم
كبر الحب بينهم
شالوه جوا قلوبهم
سر جميل محدش عرف بيه
ولا حتى هما سرحوا بيه
فضل عايش الحب سر جوا كل واحد منهم
وعبد الحليم كان واسطة الحب بينهم
كل اغنية ليه تعبر عن الحب بينهم
غربتهم الأيام وبعدتهم
لكن الحب برضه فضل عايش بينهم
والله زمان يا مصرنا
ياللى الحب دائما كان بينا
دلوقتى راح وهرب منا
محدش قادر يحب ولا يتهنا
وراح الصحاب وحتى أهلنا
بقينا بنعيش الغربة حتى وسط أهلنا
والغربة اتغلغلت حتى جوا نفسنا
والله زمان يا مصرنا
زمن الزعامة والفصاحة
زمن العلما والشعرا
زمن الجدعنة الشهامة
زمن الأصالة اللى فى دمنا
زمن الصدق والحب
والله زمان يا مصرنا
ياريت نقدر نرجع
ونرجع حتى ربع الخير اللى كان فى مصرنا
بحبك يا بلدى حتى وانت غضبانه عليا
بحبك يا ابن بلدى حتى وانت بتقسى عليا
اتفطمت على الحب يا ولدى
وباحمد ربى انى كنت عايشة زمن الحب فى بلدى
يا ريتك يا ابن عمرى
تفضل على الوعد زيى
وتخلى الحب يملا دنيتك
وينور قلبك وضحكتك
ويربط بينك وبين ولاد حتتك
ويخلى حبك لربك
هو امانك وعزك
ويقوى قلبك
فى زمن ماتت فيه المحبة
واتزرعت فيه الفرقة
والله زمان يا مصرنا
ياللى فرحك فرحنا
وجرحك جرحنا
وحبك جوا صميم قلبنا
وهانفضل عايشين جواك لاخر يوم فى عمرنا
نجلاء محمود
21 ديسمبر 2004
