PostPoems Be Artistic. Be Creative. Be Inspired!

فى حب ربى

قاعدة كل يوم أبكى

من كثر ذنبى

حاسة ان لا صلاتى ولا دعايا

هيشفعوا لى عند ربى

لحد ما جانى احن شهر فى عمرى

شهر الصيام والتوبة

شهر الرحمة والمغفرة

شهر العتق من النار المستعرة

جريت عليه اقابله بشوق وحنية

رميت نفسى فى ليله وانا بابكى

قعدت اصلى وادعى

طول الليل لحد فجرى

واطلب من الحنان المنان

انه يغفر لى ذنبى

لقيت حضن ربى

كله أمان وحنية

كله احتواء وسامع كل الدعاء

قلت له وناجيته

يا رب انا امتك اللى عصيتك

ورغم حنيتك نسيتك

لكنى رجعتلك

باجرى بشوق لرحمتك

باسعى بكل قوتى لمغفرتك

وباطلب من كل قلبى حنيتك

وحاسة انك اقرب لى حتى من نفسى

وإنك بفضل شهرك الكريم

وبنبيك العظيم

هترحمنى وتغفر لى

هتقبلنى وتضمنى

وفى حضنك هتحمينى

وعن شيطانى هتبعدنى

وبكل حنية هتهدينى

وبكل الرحمة هتقبل توبتى

يارب اقبل صلاتى

واقبل صيامى

واقبل دعايا وتسابيحى

واكتب لى اشوف بيتك وبيت حبيبك من تانى

يا رب حاكمنى برحمتك

ولا تحاكمنى ابدا بعملى

يا رب اغفر غفوتى

وسامحنى على ظلم نفسى

واقبل توبتى

وضمنى

وعن كل شرور الدنيا ابعدنى

واجعلنى اعمل كل ما تحب وترضى

وابعد عن كل ما لا تحب ولا ترضى

يا حنان يا منان يا رحمن يا رحيم

يا حق يا الله

يا حب الحقيقى لكل الأنام

نجلاء محمود