Author Information
مساجين
مدري كيف فرت في لمح ومضه كل هالسنين
في ظرف ارتعاشه عين ولهانة لعين
وكيف المسافات نبتت ما بينك وبين
وتغيرالوقت! قسى من بعد لِين
ما أدري لَكنَّ المحبة في ذمتي دين
* * *
عطشان مايروي ظماي صافي خمور الأندرين
فوق النهر مركبي ينساب مثل نغمة حنين
من شاطي الأوهام أبحر إلى شواطي مدري وين
في خاطري تشرق قصيده، هيفا مثل زهرالبساتين
في ناظري شمس(ن) حزينة، تغرب ومظهرها رزين
* * *
كلنا ركاب في نفس السفين
في غيهب اليم حيارى مبحرين
نضحك ونصخب ونبكي صامتين
نفرح ونمرح وبالداخل آسفين
ونطوف بآفاق وبحار لَكنّا مساجين
وانتي يا ذروة خيال الحالمين
لو تنظري لي... تنصتي لي... لو تسمعين:
خلي الزمن يجري
مهما يبي يجري
واعمارنا تجري
ولا تقلقي عمري
