Author Information
Kapirasong Langit
Kapirasong langit aking nadarama
Tuwing nauulinigan ang iyong halakhak
Musika sa hangin na nangungusap
Kasiyahang dala'y higit pa sa sapat.
Kapirasong langit tuwing nagdaraop
Mga palad nating inaakay ng panahon
Patungo saan man, di natin tanto
Pag-asa't pag-aasam ang nasa dako pa roon.
Kapirasong langit sa pagitan ng mga lambing
Kapag hinahagkan nang buong lakas ng mga bisig
Tila wala nang bukas kaya't namnamin
Bawat sandaling ako'y niyayapos, at matatamis na halik.
Ihip ng hangin sumasamyo sa aking pisngi
Mga matang nakatanaw sa kataasan.
Dito, dito sa aking kinalalagyan, lumalawak
Ang kapirasong langit, pag-ibig na wagas.
(Offered to Joe Enriquez, created April 13, 2008)
