Author Information
كان قلبي صغير لسه .. عبدالله عبداللطيف
Folder:
من الشعر الغنائي تجربتي الأولي .. لسه
ف أجندة ذكرياتي
كان قلبي صغير .. لسه
ف الحب أنا عشت حياتي
ولا كنتش أعرف أقسي
ولا كنت عرفت آهاتي
كان قلبي صغير لسه
كان قلبي لسه صغير
أحواله كانت بتحير
لاكن كان طيب جدا
بيحب بجد ويسهر
يكتب لحبيبه جواب
حب وأشواق وعتاب
كان قلبي يحن بهمسه
كان قلبي صغير لسه
كان يهوي إللي يغازله
ويروح علي طول ويقابله
من يوم قلبك ما نده له
وكأن ماحبش قبله
ف الحصه بنسي الدرس
مش فاكره غيرك بس
صورتك ف القلب مآنسه
كان قلبي صغير لسه
وأروح ما ييجي لي نوم
وأتلخبط طول اليوم
ومذاكرة إيه دلوقتي
والقلب معاك بيعوم
وقرايبي واخدين بالهم
يا حبيبي مالنا ومالهم
روحي وروحك متجانسه
كان قلبي صغير لسه
ومشيت وياك مشوار
حبيتك ليل ونهار
والحب ف قلبي بريء
لو فاض يملا الأنهار
ورسمتك علي كراستي
قمري وفجري وشموستي
والحب في قلبك حاسه
كان قلبي صغير لسه
وحزنت يا قلبي كتير
كان حبك بالطباشير
مع نسمة هوا بيطير
إيش حال لو جه أمشير
لاكن ذكراه دلوقتي
ف القلب بتسعد وقتي
ولا يمكن أبدا هنسي
كان قلبي صغير لسه
