Author Information
عيونك عجباني
Folder:
من الشعر الغنائي يا للي عيونك عجباني
سكنتي قلبي ووجداني
إنتي دليلي وعنواني
خلاص ما عدتش وحداني
يا للي عيونك عجباني
من يوم ما شفتك طار نومي
بحلم بقربك طول يومي
وصاحبت ليلي ونجومي
ونسيت آلامي وهمومي
يام الجمال الرباني
عشقت وردك وزهورك
ف بسمتك يطلع نورك
يفرش علي الدنيا سرورك
وتاخدي قلبي ف بحورك
يا أحلي حاجة ف زماني
يا عيون تتوه ألف دليل
بدلالها تتعاجب وتميل
والرمش جارح .. لأ وجميل
قربك دواي ولا لهش بديل
رمشك جرحني وداواني
قلبي الأسير لعينيكي
دلوقت بقي ملك إيديكي
يفضل يطوف حواليكي
في كل لحظة .. يناديكي
عيونك حلوة وسحراني
ليه تحرميني من الجنة
أنا إللي قلبي ياما إستني
يوم ما الأمل قرب منا
يصعب عليكي أتهني
وأرجع أحلم من تاني
حرام دا يعني ولا حلال
أعيش علي ذكري وموال
وحلمي يصبح كله خيال
بعد قلبي إليكي ما مال
أرجع وأعيش ليل أحزاني
