Author Information
يام الصبايا .. عبدالله عبداللطيف
Folder:
أغنيات للوطن يام الصبايا .. يا صبيه
يا روح ياسين .. يابهيه
يام الغلابه المطحونين
ع الخد سايلين دمعتين
والجفن داب من بكانا
ولسه برضو مظلومين
والعمر راح في فلسفات
وكلام كتير نسي إللي مات
لسه الغلابه مطحونين
يام الصبايا .. يا صبيه
يا روح ياسين .. يابهيه
إتظلمنا .. وإشتكينا
حوش يارب الظلم عنا
ولا رحنا .. ولا جينا
لسه برضو زي ماحنا
إتقهرنا .. وموتونا
ف المشانق .. علقونا
ولسه برضو يا ياسين
إللي قاتلك هو سيدنا
لسه الغلابة مطحونين
يام الصبايا .. يا صبيه
يا روح ياسين .. يابهيه
والسكات هو قاتلنا
مادام ياسين مش ف بالنا
وبهيه .. قطعوا توبها
مزعوه .. يا ناس قبالنا
يا بهيه جوعوكي
بهدلوكي .. خونوكي
وإحنا لسه في سكاتنا
يا بهيه مهما قلنا
لسه الغلابه مطحونين
مردناش تارنا ف ياسين
يام الصبايا .. يا صبيه
يا روح ياسين .. يابهيه
