Author Information
الصمت دهب
Folder:
أغنيات للوطن نصحوني كتير إصحابي
إني أبطل تفكيري ..
بالصوت العالي
نصحوني كيف أتعلم
قولة " وأنا مالي " !!!
نصحوني أفكر بصوتي الواطي
أو إللي " مطاطي "
في نفسي وبس
وأنسي الناس
كل الناس
وأشغل بالي .. بعيالي .. وبس
وقالوا لي إمتي هتتعلم
تبقي حكيم
لجل ما تعرف تمشي ف دربك
رغم الضلمه والتعتيم
إعرف يا بني
إن الصمت دهب
أما كلامك مش هيفيد
غير بحة صوتك إنت وبس
فكرت ..
وقلت لنفسي لأ
مليون لأ
كيف يكون الصمت دهب
وأنا شايف وطني بيضيع
معروض للبيع
ألاأونا .. ومزاد مفتوح
والنخاس .. كلب وضيع
الصمت خيانه
الحكمه
إني أحارب
إني أقاتل
مع كل الناس
لجل نبدد كل الضلمه والتعتيم
لجل ولادي ويا كل ولاد الناس
ودا أول درس في الحريه
الحريه
إللي في سبيلها نموت
لجل ما تنداس
