Author Information
قلبي أسيرك .. عبدالله عبداللطيف
Folder:
من الشعر الغنائي
قلبي أسيرك .. ولا لوش غيرك
في الدنيا دي .. ليه تبعد عني
جوه فؤادي .. تخلف ظني
ماشي ياسيدي .. كتر خيرك
قلبي أسيرك
قلبي إتعلق قوي بغرامك
مسا وصباح تلاقيه قدامك
ليه تحرمني حتي سلامك
بقي بالذمة دا يرضي ضميرك ؟
قلبي أسيرك
دا إنت هواك علي عيني وراسي
بقلبي بحبك .. وبإحساسي
ليه دلوقت بتعمل ناسي
ليه يا حياتي ؟ وإيه تبريرك ؟
قلبي أسيرك
رحت لمين قام غير حالك
عدت بتتقل قوي ف دلالك
ولا يوم تسأل وتقول مالك
ليه بتغير ف خطوط سيرك
قلبي أسيرك
دا إحنا يا روحي الحب جمعنا
هني قلوبنا شال أوجاعنا
عاوز تاني ليه ترجعنا
دا مصير قلبي نفس مصيرك
قلبي أسيرك
يا للي ف قلبي صورة جميلة
زهرة حب .. أرق خميلة
جوه ف قلبي ليك ضليله
ف ضلة قلبي تعيش عصافيرك
قلبي أسيرك
