PostPoems Be Artistic. Be Creative. Be Inspired!

اديني حقنه في العضل

انسى اللي كان و اللي حصل

ما عدتش تنفعني الحبوب

ولا الشراب ولا العسل

اديني حقنه في الصميم

تحيي عظام صارت رميم

ترجعني للحلم القديم

تقللي لسه فيه أمل

اديني حقنه و النبي

خللي الكره بملعبي

و قللي قلبي مش غبي

و محبتو مانهاش هبل

ياما قلولي الدنيا غابه

وكل من فيها ديابه

مش رايحه الا عالغلابه

مالهومش ناقه و لا جمل

عمري ما صدقت الكلام

عايشه بطيبه و احترام

بحلم بكون من السلام

و اكون أنا للغير مثل

لحد ما بانت وشوش

من عنفها ادّارت وحوش

و الموت تجارة للنعوش

و العيش محال لا يحتمل

اديني حقنه تطفي نار

تحللي في بقي المرار

ترجعلي وهم الاختيار

الإنسان وحدو  البطل