Author Information
لغة الورد
Folder:
أغاني
#لغة_الورد
لما تقلّي انتي حرّه
فيكي تروحي
وفيكي تبقي
ببكي بقهر
دموعي حسره
بدي ياك تترجاني
واشعر انك بدك ياني
اتمنّع وانا رغبانه
ابقا حدّك
اليوم وبكرا
*****
ولّما بقلّكْ ابعدْ عنّي
قصدي يعني..
قرّبْ بَعدْ
ولما بقلّك رح انساكْ
قصدي قلك
شو مشتاقهْ
لضمّة وجدْ
ولما بقلّكْ
اعشقْ غيري
مشْ فرقانهْ
بتبقا الغيره
نارْ وبردْ
ايمتا رحْ تفهمْ
يا حبّي
لغة الوردْ
******
ولما بقلك
حبك غلطة
وشو ندمانه
جرب تقرا
ضو عيوني
ولا تسمع
شو قال لساني
حلّك
تعرفني كذّابه
بفصولي
إنت نيساني
ايمتا رح تفهم
ياحبي
لغة الورد
******
بدك ياني
قول بحبك
متل الكل
حتى الكلمه
بحكم العاده
حروفا تمل
وبدك قلك
شو مشتاقه
لما تفلّ
طيب جرّب
تسمع قلبي
بنغمة فل
وقتا رح تفهم
يا حبي
لغة الورد
*********
