كان الوقت تشرين

Folder: 
أغاني

 

كان الوقت تشرين
وراق الخريف
تخشخش بدرب العمر
ونسمة خفيفه غلت بصدري
وفيقت ع مهلها فيي الحنين
وذكرت ايامك معك
ومن دون وعي.. تنهدت
متل الكأنو الآه فيها ترجعك
وضميت حالي ..
لأ طيفك انا ضميت
وبكيت
والدمع عم يحكي
وين كنا
ولوين رايحين


كان الوقت تشرين
والشمس تعبت
ومتلي مالت ع  الغياب

ولسه يا دوب غفيت
لما انت دقيت
بلهفه عليي الباب

وركدت اسأل مين
قلبي وقع مني
لما سمع هالصوت
وكرج تخمين

بعدك متل ما انت
وبعدن عيونك صيف
ووشك قمر نيسان

وغمرة دفا ما بين هالايدين
تطفي شوق سنين


ونسيت كيف مر العمر
من يوم عني مشيت
صار الوقت هوي انت
وانت الهنا اللي لقيت
وتشرين يجمعنا سوا
ويمحي من كتابي معك
قديش قلت يا ريت
ويكتب على وراق الشجر
كلمة أنا حبيت


Author's Notes/Comments: 
View thanaa_darwish's Full Portfolio