PostPoems Be Artistic. Be Creative. Be Inspired!

مو بخاطري بعّدت

ولا بخاطري تركتُن تفاصيلي

ع الباب .. ع الحيطان

ع عتبة الجيران

ع دراج عم شوفا تناديلي

مو بكيفي انا سافرت

شنتة قهر ع كتفي حملت

وهالذاكره شو كانت تقيله

امي دموعا خرّسو الكلمات

وايدين اخواتي طيور النور

بعتم الدرب بتضل توميلي

ودعوات بيي بعدن ب بالي

رفقات من عمري شو خوّفن حالي

والبحر غول كبير .. ع الشر ناويلي

وراح العمر احلم انا لاقيك

ابكي ع صدرك وانت تشكيلي

قلك كيف ضيعتنا منك

وكيف لك قلب بعدتنا عنك

كااااسك يا وطن

كاس غربتنا ولعنة هالحزن

تقلّي اتفقو ع دبحي الكل

وما الي حيله