Author Information
ذكريات
Folder:
عبور بنفسجي
صوت الشتي برا
ع سطوح هالقرميد
متل ال كأنو مرا
بتضل عم تحكي
والحكي بيعيد
والريح زلمة مرجله
فكرو بيحلّ المسأله
بشوية التهديد
بالذاكره.. طفله
رايحه ع المدرسة
بجزمة الغوما
وكل دروبا طينْ
ولسا عم تفرّك عيونا
غرقانه بِ نوما
وشو قاسيه كوانينْ
ب جيبتا "ليره تعاون ونشاط"
وخرجيتها فرنكينْ
ترجع بلا قلم الرصاص
ومضيعه قلام هالتلوينْ
بيّا يقلا.. ويفزع انو يزعلا:
والله يا بنتي.. جايبُن بالدّين
بالذاكره.. طفله
نعست وهيي عم تكتب الواجبْ
ويكمّلو خيّا
المعلمه شافت فرق الخطوط
ومْهمتا تحاسبْ
تشدّها من دانها.. وتشقّ هالورقه
وتخبّرا.. "النار جَزا الكاذبْ"
يا ريت يا خيّا
ما كان خطّك حلو.. وما كشفِتْ الكاتبْ
بالذاكره.. طفله
مع سبع روس صغار
بدهن تدريس او تلبيسْ
واما لما يضيقو ع حدا التياب
تفصّلن من جديد
تتحايل على المصروف ل يقدّي
ب لعبة التوريثْ
ويا ما صار تجليد الكتب
من الورق.. شي كيسْ
فكّرت هالطفله نست
لما مرقو سنين
لقيت الدفا مع العيله راح
وكل الفصول صارت كوانينْ
يا ريت بيي من تربتو يرجع
وامي ورا ماكينة خياطه
تدبير مع تفنينْ
ويا ريت اخواتي ع نفس سْفره
ابريق شاي وزعتر وزيتونْ
