Author Information
عيش طبيعي
Folder:
قراءات
ياما قلتلك .. يا قلبي يللي
جاي بتبكي من الخداعْ
ما تكونش في الدنيا طبيعي
والبس وشوشك زيهم
واخفي روحك
خلف ألوان القناعْ
واوعا تصدق كدبهم
دول مش أرانب
دول سباعْ
وكنت تضحك من مخاوفي
تقلي صدقي في بحورهم
يبقا مركب فارد النيّه شراعْ
وشوف بقينا فين يا قلبي
زي طفل بتبكي جوايا وتنوح
كل حلم ربيتو فيك
من ايدين الطيبه ضاعْ
مش ح لومك
أو أخبيك بضلوعي
او ألوّح بالوداعْ
ذنبنا جينا في دنيا
نشتري الحب الحقيقي بكل غالي
وبالرخيص الغدر نفس الحب باعْ
عيش طبيعي
زي نسمه .. زي زهره
وحبّ نفسك
بس اللي يحب نفسو
كل كون الله في قلبو يساعْ
