Author Information
لا تشعّلو للنور
Folder:
سرب يمام
لا تشعّلو للنور
خلّينا مِنسيين
تركنا على العتمه
صابيعنا بتدلّ
وعيوننا متل السما
تضوّي بألف نجمه
راسي على كتفك
والليل مدّ جناح
وكيف خرست الكلمه
....
وبين طيف عانق طيف
مرت نسايم صيف
شافت هوانا كيف
بضو القمر سهران
فرحانه بخيالين
عطرن دفا قلبين
لا عين تسأل وين
ونسيانُن الزمان
بكل آه عم تطلع
صوت الهوى بتسمع
وحدو الصدى يرجع
ووحدو العشق سلطان
....
بكرا الشمس بتقوم
تشلح قميص النوم
مافي عتم بيدوم
ورح تحكي قصتنا
وكل ليل عشنا فيه
بأحلامنا نضويه
حب ووفا نهديه
بصبحو خبر عنا
كنا المدى المفتوح
وكنا صلاة الروح
ناي الهوى المبحوح
اللي بحبنا تغنّى
