Author Information
سيرة ذاتية
Folder:
دندنة
نقطه.. ومن أول هالسطر
رح قلك كلمة بكلمة
كيف بيمرق فيي العمر
من يوم غرقت بعينيك
و فتحت بقلبي شبابيك
و بخّورك ع تيابي عطر
بفيق الصبح بلاقي النور
سابقني يسلّم عالكل
و فارش الوانو عالأرض
يرسم لوحة طير و زهر
و بشوفك بضحكة طفل
عم يكرج ع بساط المرج
يرجعلي عمري اللي مر
مدري شو بيخطر عالبال
و بيعلا موّال القهر
بتتعكر بركة هالمي
بشوف الأرض سجن و سور
و نحنا فيها الوهم الحر
اللي مفكر حالو بالجو
نجم كبير.. جوانح نسر
بكفر بوراقي و قلامي
بهدّم كل بيوت الشعر
برجع بتمسّا بولادي
بنسى موالي ال غنيتو
عن غربتنا بكون السرّ
وبلاقي محبة رفقاتي
بتنور عتمة ايامي
بفرد صفحة ضيق الصدر
نقطة.. و من أول هالسطر
حبّو و بس..
بيحلا فينا الطعم المر
