Author Information
قلب محروق
Folder:
أغاني
شميت ع غفله ريحة قلب محروق
وما لْحقت قلّو يا قلب اهدا وروق
معقول انّي نسيت نار الهوى تحتو؟!
ولا في مين شافو متل غابه
وخاف الشجر يصير وراق لكتابه
شعّلو ليحطّبو .. كرمال مصلحتو
ولا الغيره العميا ال ما الا شرعه
شافت عصافيري ع الحنطه مجتمعه
و ولّعت نارا ببيدر أنا زرعتو
تاري أنا من عمر كنت عم نسّ
واللي بقي مني هوي خيال وبسّ
وكلما نسيتو هالذاكره بتقول رجّعتو
