Author Information
زمان
Folder:
أغاني باللهجة المصرية
زمان
لما الحيطان
ما كنش ليها عيون ولا ليها وِدان
والجار يقول للجار
ما فيش ما بينّا حدود أو حتى بيبان
ما تخافش اتطمّن ونام وعليك الأمان
زمان
أيام ما كان الخير وافر
والنيل عظيم فارد كفوفو ع الغيطان
والجدع.. لما يبات بصدرو مية مليون وجع
يصحا يقول يا كريم
يلاقي الكريم فرّج همومو وضيقو هان
زمان
لما الصديق ستر وغطا.. يموت ولا سرّو يبان
والعيش لما يتقسم و يكفّي عشره
والكل بالحمد يقوم شبعان
زمان.. كان اسمو زمان
أما النهار ده ..
بقت العقارب لما تدور تقول عليها يوم وعدّا
ويا عالم كم يوم لسا باقي
في حكاية كان وكان
وتبكي .. بس دمعك ما يساويش خرده
بميزان القوى .. والهيلمان
