Author Information
اسمع بقا
Folder:
أغاني باللهجة المصرية
اسمع بقا
حتّتنا برضو ضيّقه
تكونش نسيت ايام "قنا"
والترعه اللي ياما خضنا بيها
لما بقيت
على شطوط "الغردقه"
وهو بقيت تعرف تعوم
والجلّابيه صبحت عليك
بدله بنجوم
حتى الفطير
بتاكلو بشوكه ومعلقه
وفتّح عينيك على الأخير
يللي بقا اسمك على لسانهم كبير
من بعد ما كان اسمك "يا واد"
وشغلتك حتّة أجير
وكنت ليهم ملطشه او تريقه
ما علينا
عادي نتغير ونبقا في العلالي
عادي ننسى اللي جرالك او جرالي
بس اللي مش عادي انا اسكت
ويبقى زي الشوك في بقّي سؤالي
"من أين لك هاذا" وييجي ردك
كل ده من فضل ربي
ياااا خبر .. يا لهو بالي
أما ربّك لوه حاجات
يدّي الحلق لل مالوش ودان
ويطعم الجوز للعجوز
والأجير يصير صاحب المعالي
ونفسي بس افكرك لو كنت ناسي
فاكر كده ميدان التحرير
والشباب ال كنت تزقّهم
وتقلّهم الشعب من حقّو يثور
وتروح مبلّغ عنّهم بقلة ضمير
أهم بقو يا في السجون يا في القبور
وانتا البطل .. المؤتمن
بعديها رحت وقبضت التمن
أنك بقيت أمّة ووطن
وال يسألك
يبقى على الأمة خطير
