#بريد
بعتّلّي رساله
ع صندوق البريد
مانا من خيالي
ماسكتا بالإيد
وعنواني ب خطّك
بيزيد التأكيد
***
اول مره بيوصل
من عندك خبر
ياما حلمت فيه
ونطرتو عمر
تاري حلمي تأخّر
ليفتّح زهر
***
وفتحت المكتوب
بقلب عم بيدوب
عطرك ما بيكزّب
وأشواقي المحترقه
عم تفتح الورقه
وشو تبعّد وتقرّب
وفكّر شو كاتبلي
وشو حابب تقلّي
أتحزّر وجرّب
****
بيضا هالرساله
كلمه وحده قبالي
"بحبك" مع قلبين
قريتا الف مرّه
شم بروحي عطرا
اللي انقسم ع تنين
كيف قدرت هالكلمه
تكون مراية حلمي
وال كاتبها مين
قلبك ولا قلبي
من عمر بيخبّي
ويداري الحنين