Author Information
آدم
Folder:
أغاني باللهجة المصرية
واخد بالك
لما تحس الخلق عيالك
ولما تشوف
بعين الرحمة
الذل .. الخوف
وهمّ اللُقمة
خيرك ليهم لو يوم جالك
وقتها يبقا اسمك آدم
وربك وحدو بإسمك عالم
ويعوّض النقص بمالك
واخد بالك
لما الناس كده تغتاب
بعضيها بكلام كدّاب
وانتا مشغول بأحوالك
ولما تبيعك بفكّه قديمه
وتبقا بعينهم من غير قيمه
بعد ما كنت الزير سالم
سيد القوم وابو زيد خالك
وقتها يبقا اسمك آدم
وربك وحدو بإسمك عالم
وبعينو آيه بِ جمالك
واخد بالك
لما الدنيا تبقا غابه
والأقوى مكشّر انيابه
وفين تخبّي لطف غزالك
ويبقا المال وحدو الغايه
ويكسرو قلبك زي مرايه
ولا تلقاش قاضي بيحاكم
وقتها اسمك في السما آدم
وربك وحدو بإسمك عالم
وبيكتب بالنور افعالك
