بطّلت حبك

Folder: 
دندنة

 

 



بطّلت حبّك.. اي

ما عاد تبعتلي مع طيور السما تزكار

ما عاد تشلحلي ورد من فوق سور الدار

وتوشوش الجاره حكي اللي بتفضح الأسرار

*

بطلت حبك.. روح

شوك الصبر ناعم 

بروحي بقي علقان

 

صرلي عمر بخفيه

وسكّت وجع السنين

بِ غفوة النسيان


صار الوقت ارتاح 

من عتمة اللي راح

وشوف الدني ألوان

*


قالو اللي  بيحب.. بيهمّو 

يلاقي حبيبو متهنّي معو وسعيد


بيشاركو حتى سما حلمو

وكل يوم عندو بالمحبه جديد 


وقالو ما بيشبع يضمّو

كلما ارتوى كاس الهوى بيعيد


ينادي البشر كلّن باسمو

هوّي الاصل وباقي الصور تِقليد

*


ما شفت من ال قالوه عندك شي

ما شفت الا دمعتي عم تحفر ب وشّي

صار الوقت لتروح أو أنا أمشي

واوعك يا دنيي بعد 

وراق اللعب ب غفلتي تغشّي

*


ياما قلت.. عطيني وقت
بحقك انا.. كتير غلطت
ندمان قلبي وتاب

وعدك تلج ما ابيضو
يغطي على سنيني ال مضو
واليوم تلجك داب

 كل جرح في بعدو جرح
وتعبت عم رش الملح
بس الجرح ما طاب




View thanaa_darwish's Full Portfolio