Author Information
كفّك
Folder:
دندنة
#كفّك
وتطلّعي .. شوفي
كفّك غفي
متل الطفل
بِ حضن كفّي
غنيتلو.. شوقي الو
وبست الحلو
صارت سما الشفّه
غطّيتو بتاني ايد
خوفي عليه
تفزّعو الدنيي
حتى ولو نتفه
وتطّلعي.. لما وعي
ضلّو معي
لا انا تركتو يروح
ولا انتي قدرتي تودّعي
كفّك مدى مفتوح
ومروج خضرا وروح
قلبي بيندهلا تعي
كفّك متل غيمه
شتّت عليي خير
شفت الدني اوسع
جنة سلام ونور
ايدي متل بيدر
وكفك كأنو طير
وكفّك اذا بدّو
بيفصّل الدنيي
كبيره على قدّو
بيفتح بواب مسكّره
وما في حدا يردّو
كفّك اشاره من السما
وقلبي بيفهم بالوما
باقي العمر عندو
خليك يا كفّا هون
املا فراغ الكون
يا حكاية الاعراب
ضم وفتح وسكون
