تشكّرات

Folder: 
دندنة

 

 

تشكّرات.. تشكّراااات

لكلّ مين إداني مرّه بالقلم

عشان أشوف .. حقيقي ايه معنى الحياة

وانها مش شعر أو مزّيكا أو معرض لوحات

وإنها مش درس أخلاق وضمير وفي الطريق عزم وثبات

ومش حقيقي الإدّعاء

ان للباطل جَوله.. وللحق من بعدو جُولات

وفوّقني من نوم العسل

وقلي بصّي.. الدنيا ماشيه ازاي

الندل فيها هوّا اللي سمّوه البطل

 سوق نخاسه.. أو تجاره.. خود وهات


تشكّرات.. تشكّرااااات

لحلم بمبي.. عشتو يا قلبي 

وكنت فيه سلطان زماني

والدنيا من حوليّا جنة 

بطير على جناح الاغاني

ونقبي طلع على مافيش

وطااار حلمي زي ريش

ولقيتني لسه في مكاني

ومن يوميها 

اضحك على الأحلام 

محال اسيبها 

تضحك تملّي عليّا تاني


تشكّرات .. تشكرات ..وسلام مربّع

لكل من كدّب كلامي ال غير مقنِع

وقلّي انتي من كلامك أجمل و أروع

ومحال تكوني الا انتي .. لو زمان الخير تضعضع

انتي صوت الفن فينا.. اللي يخلّي الدنيا أوسع

وانتي ناي الحب لما غنّى ولما ابدع

وعود يجود .. انغامو أنسام وورود

وشمس بكرا ال حالفه تطلع

علّي صوتك.. سيبي صوتك رنة الخلخال في الفن المشخلع

واوعي تنسي اللي سوّاكي مناره

يا أميره.. والكراسي من علو صوتك

لابد ما تهتز في يوم واصحابها تخلع



View thanaa_darwish's Full Portfolio