Author Information
ندم
Folder:
أغاني باللهجة المصرية
يا خطوِتو مشوار عُمر
مِن القفص
لحدّ حبل المشنقه
طريق طويل والذكريات
بتمرّ كده قدّام عينيه
من خُرم إبره ضيّقه
صورتو وهو يشوف ابوه
سَكران صُحابو يسنّدوه
أمّو بتحرق نفسها
من لما فاض بيها بقا
والبيت اللي اسمو عيله
صار بس صوره معلّقه
وابتدا درب الشقا
السرقه صارت مصلحه
شقّه و من بعديها شقّه
والتعاطي في الجحور
فن الرزيله المُطلقه
وآخرتها كان الاغتصاب
والقتل عن عمدٍ ورصد
مالوش مبرّر في الحساب
غير بس تاريخ الوحوش
ف دمّو والعيشه الهِباب
وكل شيء ضدّو التقا
والقاضي يسأل عاوز ايه
رغبه أخيره مُحقّقه
يقول بآخر دمعتين
يا ريت اعود يا سيدي عيّل
بحضن أسرة وضلّ أهل
واكتب حكاية مُشرّفه
وعيش حياتي مُشرقه
