Author Information
شو يا حلو
Folder:
دندنة
شو يا حلو..
من ايمتا بتمرّ
من غير.. صباح الخير
و شبّاكنا المفتوح
ياما عليه رميت
زرار الورد وشلوح
من زنبق ومنتور
تيبلش نهاري
مهفهف بعطر و نور
وكيف لك قلب يا حب
من بعد كلشي كان
تمرق على السكيت
كيف لك قلب ياحب
تغير طريق البيت
كيف لك قلب يا حب
بمحاية النسيان
تمحي قمر نيسان
تقللي رسايلنا
كانت حكي صبيان
وشو يا حلو.. هالقد
هانت ليالي الود
ما عاد وشّي صبح
يضوي عتم هالكون
ولا لمسة كفوفي
بلسم شفا للجرح
ولا غمرتي جنّه
ولا شفافي ورد
تاري الحلا سكّر
يمكن ع غفله يدوب
والشمس لو طلعت
عم ينطرا الغروب
وقصايد العشاق
شوية حبر وحروف
وصوتك إذا غنيت
بكفّ القسا مصلوب
